I 2005 blei fem personar redda frå den sikre død i fritidsbåtulykker. I 2006 er dette talet auka til 23 personar.

– Nye grupper uerfarne båtførarar kjøper fritidsbåtar som er større og går raskare utan at dei har nødvendig kunnskap og respekt for utfordringane dei møter på sjøen. Utviklinga underbyggjer også viktigheita av arbeidet som er sett i gang med obligatorisk båtføraropplæring, seier Stene.

13 nye, hurtiggåande redningsskøyter med frivillig mannskap, tar unna mange av oppdraga med fritidsbåtflåten, medan dei tyngre redningsskøytene med profesjonelle sjøfolk og redningsmenn om bord, utfører hovuddelen av oppdraga med yrkes– og fiskeflåten langs kysten.

Færre oppdrag

Totalt sett har talet på oppdrag gått ned, men nokre distrikt har hatt til dels kraftig auke. Dette gjeld både Oslofjordområdet, Møre og Romsdal, Rogaland og Bergensområdet.

– Vi ser også tendensar til at talet på oppdrag totalt sett har samanheng med overgangen til hurtiggåande redningsskøyter. Større aksjonsradius med hurtigare farty, aukar talet på oppdrag. Dei nyaste hurtiggåande redningsskøytene våre har dessutan slepekapasitet til å ta tak i større farty enn tidlegare, noko som aukar den generelle sjøtryggleiken på fleire område, ikkje minst på miljøsida, seier Stene.

Totalt redda mannskap hos Redningsselskapet 44 liv i 2006. Dei berga dessutan 135 farty og 5.549 farty fekk assistanse. (NPK)